विश्वासको मत लिने दिनमा संसद् अवरोध नगरिदिन सभामुखको अनुरोध

काठमाडौँ । सभामुख देवराज घिमिरेले प्रधानमन्त्री पुष्पकमल दाहाल प्रचण्डले विश्वासको मत लिने दिनमा संसद् अवरोध नगरिदिन विपक्षमा रहेका राजनीतिक दलका नेताहरुसँग अनुरोध गरेका छन् ।

सोमबार बसेको कार्यव्यवस्था तथा परामर्श समितिको बैठकमा उनले यस्तो बताएको सचिवालयले जनाएको छ ।

‘संसदीय अभ्यासमा केही यस्ता बिजनेस पनि हुन्छन्, जहाँ सत्तापक्ष र प्रतिपक्ष एक ठाउँमा आउनुपर्छ । जस्तो कि केही दिनअघिमात्रै हामीले नीति तथा कार्यक्रम प्रस्तुत गर्दा सौहार्दता प्रस्तुत गरेका छौँ,” सभामुख घिमिरेले भने, ‘प्रधानमन्त्रीको विश्वासको मतको विषय पनि यस्तै हो । एक सातापछि नै बजेट ल्याउदैछौँ । मुलुकको कार्यकारी प्रमुखले बहुमत परीक्षण गर्छु भनेर संसदमा प्रस्ताव गरेको अवस्थालाई प्रभावित बनाउनुहुँदैन ।’