कांग्रेसले समय मागेपछि प्रतिनिधिसभाको बैठक बस्न ढिलाइ

काठमाडौँ । प्रमुख प्रतिपक्ष दल नेपाली कांग्रेसले केही समय मागेपछि प्रतिनिधिसभाको बैठक बस्न ढिलाइ भएको छ ।

प्रतिपक्षी दलले केही समय माग गरेकाले बैठक ढिला भएको सभामुख देवराज घिमिरेको सचिवालयले जनाएको छ ।

बैठक बिहान ११ बजेका लागि बोलाइएको थियो । सदनको गतिरोध हटाउन प्रधानमन्त्री प्रचण्ड, एमाले अध्यक्ष केपी शर्मा ओली र गृहमन्त्री रवि लामिछानेबीच पनि भेटवार्ता भएको थियो ।

त्यो वार्ता सकिए पनि विपक्षी दलले समय मागेपछि सभामुख दलका प्रमुख सचेतकसँग छलफलमा जुटेका छन् ।

बिहीबार बसेको बैठकमा कांग्रेस र एमालेका सांसदहरुबीच धकेलाधकेलको स्थिति भएको थियो ।