काठमाडौँ । जसपाका अध्यक्ष अशोक राईले अल्पमतको निर्णयलाई उपेन्द्र यादवले पार्टीमा सर्कुलर गरेपछि विद्रोह गरेको बताएका छन् ।
जसपा नेपालबाट अलग भएपछि बिहीबार भएको पत्रकार सम्मेलनमा बोल्दै राईले महाधिवेशन नै अनियमित ढंगले कब्जा गर्ने देखिएपछि नयाँ पार्टी बनाएको बताए । उपेन्द्र यादवको कार्यशैलीनै समस्या बनेको उनको भनाई छ ।
पत्रकार सम्मेलनमा बोल्दै राईले भने, ‘उहाँविरुद्ध असन्तुष्टि त छँदै थिए । महाधिवेशन नै अनियमित ढंगले कब्जा गरेर आफ्नो मुठ्ठीभित्र पार्टी राख्ने गतिविधि देखिएपछि, उहाँ अमेरिका उड्नुअघि एउटा परिपत्र जारी गर्नुभएको छ । त्यसको नमुना त्यो पनि हो । त्यो परिपत्रले विष्फोटक स्थिति बनायो ।’
उनले सत्ताको अंकगणितको कारणले आफूहरुले पार्टी विभाजन नगरेको प्रष्ट पारे । उनले भने, ‘सत्ताको अंकगणित मिलेकै थियो, त्यो फेर्ने प्रयास भइरहेको कुरा आएको थियो, त्यो संवेदनशिल थियो । यो पार्टी बनेपछि हामीले अस्थिरताका कारक हुँदैनौं भनिसकेका छौं । मुलुक अहिले अस्थिरताको सिकार हुँदै आएको छ ।’
