काठमाडौँ । राष्ट्रिय प्रजातन्त्र पार्टी (राप्रपा)ले नेपालको राजालाई पनि आफ्नो स्थान, श्रीपेच र इज्जत देन माग गरेको छ । सरकारले कतारका अमिर (राजा) शेख तमिम बिन हमाद अल थानी नेपालको राजकीय भ्रमणमा आउने दिन सार्वजनिक बिदा दिएपछि राप्रपाले सो माग गरेको हो ।
सरकारले सार्वजनिक बिदा दिने निर्णय गरेपछि राप्रपाका प्रवक्ता मोहन कुमार श्रेष्ठले संक्षिप्त प्रतिक्रिया दिँदै आफ्ना राजालाई पाखा लगाएर विदेशी राजालाई सम्मान गरेको टिप्पणी गरेको हो । उनले नेपालका राजालाई पनि सम्मान गर्न आग्रह गरेका छन् ।
विदेशीको योजनामा नेपालका राजालाई पाखा लगाइएको उनको भनाइ छ । उनले नेपालका राजालाई पनि स्थान, श्रीपेच र इज्जत दिन माग गरेका छन्।
‘कतारका अमिर (राजा) शेख तमिम बिन हमाद अल थानी दुई दिने भ्रमणका लागि नेपाल आउँदा सरकारले मंगलबार सार्वजनिक बिदा दिएको छ । आफ्नो देशको राजालाई विदेशी योजनामा पाखा लगाएकाहरुले विदेशकै राजालाई भएपनि सम्मान दिएछ !’ प्रवक्ता श्रेष्ठले लेखेका छन्, ‘नेपालको राजालाई पनि आफ्नो स्थान, श्रीपेच र इज्जत देउ । सबैभन्दामाथि देश ।’
थानी राष्ट्रपति रामचन्द्र पौडेलको निमन्त्रणमा दुई दिने भ्रमणमा नेपाल आउनका लागेका हुन् । भ्रमणका क्रममा द्विपक्षीय सम्झौता हुने परराष्ट्र मन्त्रालयले जनाएको छ ।
