काठमाडौँ । नेकपा माओवादी केन्द्रका उपमहासचिव वर्षमान पुन अनन्तले मन्त्रीमण्डल पुनर्गठनका क्रममा नेपाली कांग्रेसलाई गृहमन्त्री दिने कुनै सहमति नभएको बताएका छन् ।
मन्त्रीमण्डल पुनर्गठनका क्रममा माओवादीले अर्थमन्त्रालय लिएर कांग्रेसले गृहमन्त्री लिने सहमति भएको चर्चा चलिरहँदा बुधबार बसेको प्रतिनिधि सभाको बैठकका क्रममा संसद् भवन परिसरमा पत्रकारहरूसँग कुरागर्दै नेता पुनले त्यस्तो कुनै सहमति नभएको दावी गरे ।
उनले भने ‘गृहमन्त्री कांग्रेसले लिने कुरा भएको छैन। राष्ट्रिय सभा अध्यक्ष र मन्त्रीपरिषदको कुरा बेग्लै हो ।’ संघीय संसद्को माथिल्लो सदन राष्ट्रिय सभाको अध्यक्षमा आफूहरूको दाबी रहने उनले बताए ।
राष्ट्रिय सभा अध्यक्ष प्राकृतिक रुपले माओवादी केन्द्रले दाबी गर्छ। यसमा हाम्रो दाबी रहन्छ’, उनले भने, ‘कोसी प्रदेशमा सत्ता गठबन्धन सफल भएन। अहिलेको शक्ति सन्तुलन मिलाउन पनि माओवादीले राष्ट्रिय सभाको अध्यक्ष पाउन पर्छ।’
पुनले कांग्रेसबाट राष्ट्रपति, एमालेबाट सभामुख र रास्वपा उपसभामुख रहेकाले राष्ट्रिय सभा अध्यक्षमा माओवादीको दाबीलाई स्वभाविक रुपमा लिनुपर्ने जिकिर गरे ।
