काठमाडौँ । प्रमुख प्रतिपक्षी नेकपा एमालेले जनताका ७ सय ५१ वटा माग समेटिएको ज्ञापनपत्र सरकारलाई बुझाएको छ ।
एमाले अध्यक्ष केपी शर्मा ओलीसहितको टोलीले मंगलबार बिहान प्रधानमन्त्री निवास बालुवाटार पुगेर जनस्तरबाट आएका ७ सय ५१ माग र तिनका समाधानको उपायसहितको ज्ञापनपत्र बुझाएको हो ।
एमालेले गत मंसिरमा गरेको मध्यपहाडी लोकमार्ग केन्द्रीत संकल्प यात्राका क्रममा जनताबाट आएका गुनासोलगायतका समस्याहरु समेटेर ज्ञापनपत्र बुझाएको हो ।
एमाले उपमहासचिव प्रदीप ज्ञवालीका अनुसार पार्टीलाई विभिन्न ४६ वटा जिल्लाबाट प्राप्त भएका ७ सय ५१ वटा माग समेटिएको छ । ज्ञापनपत्रमा गण्डकीका १६१, कोशीका १७०, सुदूरपश्चिमका १३५ र बागमतीका १३३, कर्णालीका ७९, लुम्बिनीका ७५ र मधेसका ८ वटा समस्या र ती समस्याका समाधान समेटिएको उपमहासचिव ज्ञवालीले बताए ।
जनताबाट आएका गुनासाहरुलाई वर्गीकरण गरी तिनको समाधानको उपायसमेत लिखित रुपमा सरकारलाई बुझाइएको ज्ञवालीले बताए ।
ज्ञापन पत्र ग्रहण गरेसँगै प्रधानमन्त्री पुष्पकमल दाहालले यी विषयलाई आफूले गम्भीरताका साथ लिएको र एमालेको अभियानले लोकतन्त्र बलियो बनाउन मद्दत गरेको बताउनुभएको पनि उपमहासचिव ज्ञवालीले बताए ।
सुझावलाई दराजमा थन्क्याउने नभइ कार्यान्वयन गर्ने प्रतिवद्धता प्रधानमन्त्रीले दिनुभएको बताए ।्
