प्रतिनिधिसभा बैठक एक घन्टाका लागि स्थगित

काठमाडौँ। नेकपा एमाले, राष्ट्रिय स्वतन्त्र पार्टी र राप्रपाको अवरोधपछि प्रतिनिधिसभा बैठक एक घन्टाका लागि स्थगित भएको छ।

राष्ट्रपतिले नागरिकता विधेयक प्रमाणीकरण, प्रधानमन्त्रीको भारत भ्रमण र आममाफीको विषयमा प्रधानमन्त्रीले जवाफ दिनुपर्ने भन्दै प्रतिनिधिसभामा अवरोध गरेपछि सभामुख देवराज घिमिरेले १ घन्टाका लागि बैठक स्थगित गरेका हुन्।

आइतबार संसदको बैठक सुरु भए लगतै प्रतिपक्षी दलका सांसदहरु उठेका थिए। त्यसपछि सभामुख देवराज घिमिरेले समय दिएपछि एमाले प्रमुख सचेतक पदम गिरी, रास्वपाका प्रमुख सचेतक सन्तोष परियार र राप्रपा अध्यक्ष राजेन्द्र लिङ्देनले नागरिकता विधेयक प्रमाणीकरणको प्रक्रिया गलत भएको भन्दै विरोध गरे।

दुवै सदनले दुईपटक पारित गरेर पठाएको विधेयक पूर्वराष्ट्रपति विद्यादेवी भण्डारीले रोकेकी थिइन्। मन्त्रिपपिरषद् बैठकले नागरिकता विधेयक प्रमाणीकरण गर्न आग्रह सहितको पत्र पठाएपछि राष्ट्रपति रामचन्द्र पौडेलले जेठ १७ मा नागरिकता विधेयक प्रमाणीकरण गरेका थिए।