शिक्षाका संरचनामा प्रतिस्पर्धा गराउन चाहेको प्रधानमन्त्रीको भनाई

काठमाडौँ । प्रधानमन्त्री पुष्पकमल दाहाल प्रचण्डले आफूले विश्वविद्यालयलगायतका शिक्षाका सम्पूर्ण संरचनामा प्रतिस्पर्धा गराउन चाहेको भन्दै त्यसका लागि तयार रहन प्राज्ञहरूलाई आग्रह गरेका छन् । मंगलबार बिहान काठमाडौंमा आयोजित कान्तिपुर एजुकेसन समिटलाई सम्बोधन गर्दै प्रधानमन्त्री प्रचण्डले यस्तो बताएका हुन् ।

प्रतिस्पर्धामार्फत शिक्षाको गुणस्तर उकास्न आफूले पहल लिने प्रधानमन्त्रीको भनाई छ । ‘मैले घोषणा गरिसकेको छु, अब विश्वविद्यालयहरूमा राजनीतिक भागवण्डा हुने छैन । मेरिटोक्रेसीका आधारमा उपकुलपतिलगायतका पदाधिकारीहरू नियुक्त हुनेछन् । यसले योग्यले जिम्मेवारी प्राप्त गर्ने अवसरको ढोका खुल्नेछ,’ उनले भने, ‘विश्वविद्यालयका पदाधिकारीहरूले उच्च मनोबलका साथ आफ्नो विज्ञता प्रस्तुत गर्ने वातावरण मिल्नेछ, विद्यार्थी, अभिभावकलगायतमा उच्च शिक्षा र पदाधिकारीहरूप्रति भरोसा बढ्नेछ ।’

शिक्षालगायत राष्ट्रिय जीवनका अधिकांश क्षेत्रमा भूमण्डलीकरणको प्रभाव परिरहेको उनको भनाई छ ।