काठमाडौँ । प्रधानमन्त्री पुष्पकमल दाहाल प्रचण्डले आफ्नी छोरीमाथि भएको आक्रमण व्यवस्थामाथिकै हमला भएको बताएका छन् ।
संसदको राज्य व्यवस्था तथा सुशासन समितिले एनसेलको शेयर खरिदबारे छलफल गर्न मंगलबार प्रधानमन्त्री प्रचण्डले यस्तो बताएका हुन् ।
उनले भने, मेरो परिवारमा अब तीन जना सदस्यमात्रै बाकी छन् । एउटा छोरी रेणु दाहाल चितवन महानगरपालिकाको मेयर छन् । अर्को छोरी मेरो सचिवालयमा काम गरिरहेको छ । त्यो बिचरा कस्तो छ, सबैलाई नै थाहा छ । उसलाई जोडेर कहिले उचालिएको छ, कहिले पछारिएको छ । यो लोकतान्त्रिक व्यवस्थाविरुद्धको हमला हो ।
बैठकमा सांसदहरुले एनसेलको शेयर खरिद गरेका गैरआवासीय नेपाली सतीशलाल आचार्यसँगको सम्बन्ध तथा प्रधानमन्त्री र उनकी छोरी गंगा दाहालको संलग्नता छ भनेर सांसद अमरेशकुमार सिंहले गरेको दाबीबारे समेत प्रश्न गरेका थिए ।
जवाफमा प्रधानमन्त्री प्रचण्डले शेयर खरिद बिक्री गर्नेहरुलाई चिनेको बताए । आफ्नी श्रीमती बिरामी भएका बेला सिंगापुर गएर उनीहरु कहाँ बसेको भन्दै उनले भने, ‘शेरबहादुर देउवा पनि बस्नुभएको छ, केपी ओली पनि बस्नुभएको छ । तर यसको अर्थ सिष्टमका विरुद्ध कोही जान्छ भन्न अनुहार हेरेर मानिँदैन । राष्ट्र र जनताको हित मुख्य हो ।’
