काठमाडौँ । नेकपा एमालेले बैतडीको झुलाघाटबाट मध्यपहाडी लोकमार्ग केन्द्रित विशेष अभियान सुरु गरेको छ ।
एमाले अध्यक्ष केपी शर्मा ओलीले ‘सम्बन्ध स्थानीय, सन्देश राष्ट्रिय’ नाराका साथ शुरु भएको राजनीतिक यात्राको झुलाघाटमा झण्डोत्तोलन गरी यात्राको शुभारम्भ गरेका छन् ।
बैतडीको झुलाघाटबाट शुरु भएको यात्रा पाँचथरको चिवा भन्ज्याङसम्म झण्डै १८ सय किलोमिटर लामो यात्रा तय गरेर पुष १ गते सकिनेछ । संगठनलाई थप मजबुत पार्ने उद्देश्यका साथ गर्न लागिएको मध्यपहाडी यात्रामा २० हजारजना सहभागी हुने दाबी गरिएको छ। यात्राका क्रममा ठाउँ ठाउँमा सभा हुनेछन्।
गोठालापानी, सिलगढी, मंगलसेन, दैलेख, सुर्खेत, रिम्ना, वामीटक्सार, कुस्मामा पार्टीका शीर्ष नेताहरूले सम्बोधन गर्नेछन्। त्यस्तै, सन्दरबजार, बट्टार, कुन्तावेंसी, चरिकोट, हर्कपुर, भोजपुर, बसन्तपुर, फिदिम र च्याङ्थापु ठूला सभा आयोजना हुनेछन्।
एमालेले दैनिक एक सय किलोमिटर यात्रा गर्ने लक्ष्य राखेको छ। अभियानका क्रममा ठाउँ ठाउँमा सानाका खालका कोणसभा, भेला बैठक, पार्टी मिटिङसमेत आयोजना गरिनेछ।
यात्राका क्रममा एमालेले जनाका समस्या सुन्ने, विकास निर्माणको अवस्थाबारे जानकारी लिने, विभिन्न क्षेत्रका व्यक्तिसँग अन्तरक्रिया गर्ने योजना एमालेको छ।पूर्वप्रधानमन्त्री समेत रहेका ओलीसहित एमालेको शीर्ष नेतृत्वको आउजाउलाई व्यवस्थित गर्न सुरक्षा व्यवस्था कडा पारिएको छ।
