काठमाडौँ। राष्ट्रिय स्वतन्त्र पार्टी (रास्वपा)का सभापति रवि लामिछानेले जनताको चेतनामाथि प्रश्न नगर्न नेकपा एमालेका अध्यक्ष केपी शर्मा ओलीलाई आग्रह गरेका छन्।
मंगलबार काठमाडौँमा आयोजित पार्टीको नीति मन्थन कार्यक्रमलाई सम्बोधन गर्दै उनले यस्तो बताएका हुन्। लामिछानेले नयाँ पार्टीलाई हेरौं भनेर मात्र आफूहरुले मत नपाएको बताए।
सोमबार एमालेको पार्टी केन्द्रीय कार्यालय च्यासलमा अध्यक्ष ओलीले नयाँ दलप्रति लक्षित गर्दै नीति, विचार र सिद्धान्त नभएका दलहरुलाई भोट दिने जनता पनि कस्ता? भन्ने अभिव्यक्ति दिएका थिए।
सोही अभिव्यक्तिलाई लिएर सभापति लामिछानेले जनताको चेतनामाथि प्रश्न नगर्न आग्रह गरेका हुन्। लामिछानेले आफ्ना नेताहरु भ्रष्टाचारको आरोपमा जेल बसिसक्दा, राष्ट्रको ढुकुटी रित्याउँदा हरेक क्षेत्रको सूचकांक कमजोर बनाउँदा पनि तपाईकै दललाई भोट हालिरहने? भन्ने प्रश्न गरेका छन्।
आफ्नो पार्टी जनताको चेतनालाई चुनौती दिने हैसियतमा नरहेको बताए।
