काठमाडौँ। सत्ता गठबन्धनले कोशी प्रदेशमा नेकपा माओवादी केन्द्रका इन्द्र आङ्बोलाई मुख्यमन्त्रीमा अघि सार्ने निर्णय गरेको छ। बिहीबार प्रधानमन्त्री निवास बालुवाटारमा बसेको गठबन्धनको बैठकले यस्तो निर्णय गरेको हो।
माओवादीलाई मुख्यमन्त्री दिन नसकिने अडान लिएको नेपाली कांग्रेसले कुनै हालतमा आफ्नो पक्षमा बहुमत नजुटेपछि माओवादी केन्द्रका आङ्बोलाई अघि सारेको हो।
यसअघि कांग्रेसका उद्धव थापा दुई पटकसम्म मुख्यमन्त्री बने पनि विश्वासको मत जुटाउन असफल भएका थिए। अब फेरि कांग्रेसकै मुख्यमन्त्री बन्दा विश्वासको मत पाउने आधार नदेखिएपछि गठबन्धनले माओवादीलाई दिने निर्णय गरेको कांग्रेसका प्रमुख सचेतक रमेश लेखकले जानकारी दिए।
माओवादीले आफूहरूले बहुमत जुटाउने दाबी गर्दै आएको छ। यसका लागि प्रधानमन्त्रीसमेत रहेका माओवादी अध्यक्ष पुष्पकमल दाहाल प्रचण्डले राप्रपाका अध्यक्ष राजेन्द्र लिङ्देनलाई भेटिसकेका छन्। गठबन्धनलाई सरकार गठनमा सघाएमा कोशी प्रदेशको सभामुख राप्रपालाई दिन पनि दलहरू सहमत भएका छन्। तर राप्रपाले औपचारिक निर्णय गरेको छैन। यसको लागि शुक्रबार बैठक बोलाएको छ।
नेकपा एमालेका मुख्यमन्त्री हिक्मत कार्कीले राजीनामा दिएपछि प्रदेश प्रमुख परशुराम खापुङले भोलि शुक्रवार साँझसम्म मुख्यमन्त्रीको नाम सिफारिस गर्न समय दिएका छन्।
प्रदेशसभामा सरकार गठनको यो अन्तिम संवैधानिक विकल्प हो। यस पटक पनि बहुमत नजुटेमा प्रदेशसभा नै विघटन हुन्छ।
