विराटनगर। कोशी प्रदेशका मुख्यमन्त्री हिक्मतकुमार कार्कीले शनिबार विश्वासको मत लिने भएका छन्।
सर्वोच्च अदालतको परमादेशपछि भदौ २२ गते संविधानको धारा १६८ को उपधारा ३ अनुसार मुख्यमन्त्री भएका कार्कीले विश्वासको मत लिने प्रयोजनका लागि प्रदेशसभाको चौथो अधिवेशन आजदेखि सुरु भएको छ। मुख्यमन्त्री कार्कीले असोज २० गते शनिवबार विश्वासको मत लिने तयारी भएको नेकपा एमाले कोशी प्रदेश संसदीय दलका प्रमुख सचेतक रेवतीरमण भण्डारीले जानकारी दिए।
विश्वासको मत नपाए मुख्यमन्त्री कार्की स्वतः पदमुक्त हुनेछन् भने संविधानको धारा १६८ को उपधारा ५ अनुसार अर्को सरकार गठनको प्रक्रिया सुरु हुनेछ।
अहिलेसम्म मुख्यमन्त्री कार्कीलाई एमाले बाहेकका दलले विश्वासको मत दिने निर्णय लिएका छैनन्। यसअघि एमालेकै कित्तामा उभिएको राप्रपा पनि यसपटक मत नदिने बताएको छ।
९३ सदस्यीय प्रदेश सभामा विश्वासको मत पाउन ४७ मत आवश्यक पर्छ। तर, एमालेलाई अन्य दलले समर्थन नगरेको र एमालेसाँ मात्रै ४० मत रहेकाले विश्वासको मत पाउने सम्भावना अति नै न्युन छ।
एमालेका ४० सांसदमा पनि उपसभामुख एमालेकै छिन्। सभामुख नभएकाले उपसभामुखले सभाको अध्यक्षता गर्नुपर्ने अवस्था छ। त्यसैले कार्कीको पक्षमा जम्मा ३९ मत पाउने अवस्था देखिन्छ।
कोशीमा एमालेबाहेक कांग्रेसको २९, माओवादी केन्द्रको १३, राप्रपाको ६, नेकपा एकीकृत समाजवादीको ४ र जसपाको १ सांसद छन्।
