काठमाडौँ । नेकपा एमालेका सचेतक महेश बर्तौलाले सरकारले सहमति गरेपनि कार्यान्वयन गर्न भने नसकेको भन्दै असन्तुष्टि जनाएका छन् ।
सचेतक बर्तौलाले सुन तस्करी प्रकणमा असोज ५ गते उच्चस्तरीय जाँचबुझ आयोग निर्माण गरि कार्य प्रारम्भ गर्ने सरकार र दलहरूबीच सहमति भएपनि उक्त सहमति बमोजिम अगाडी बढ्न र कार्यान्वयन गर्न अहिले सरकार तयार नभएको बताए ।
राजनीतिक सहमतिप्रति सरकारबाट ठुलो धोका भएको भन्दै उनले सुन लगायतको तस्करी र गैरकानुनी धन्दामा उच्चस्तरीय सरकारी संलग्नता प्रतिको आशंका झन बढेर गएको समेत बताएका छन् ।
‘आफैँले गरेको सहमतिलाई समेत लत्याएर राजनीति र संसदलाई घात प्रतिघात, धोकाधडी, अविस्वास र द्वन्द्वतर्फ धकेल्न सरकार प्रयत्नसिल रहेको हो कि भन्ने आशङ्काप्रति यस घटनाले सत्य प्रमाणित गरेको छ । यो देशको लागी असाध्यै दुःखद् र गम्भीर चिन्ताको विषय हो । यद्यपि, संवाद र छलफलको प्रयत्नलाई भने सकारात्मक रुपमै लिएका छौँ ।’ सचेतक बर्तौलाले सामाजिक सञ्जालमा भनेका छन् ।
