काठमाडौँ। प्रमुख प्रतिपक्षी दल नेकपा एमालेका अध्यक्ष केपी शर्मा ओलीले नेपाली कांग्रेसका प्रदेशसभा सदस्य खगेनसिंह हाङगामले ताप्लेजुङका डिएसपीलाई परिवारसहित मार्छुभन्दा पनि सरकारले नियन्त्रणमा लिन नसकेको बताएका छन्।
सोमबार पार्टी कार्यालयमा तेजाब आक्रमणविरूद्धको दिवसका सन्दर्भमा आयोजित कार्यक्रममा ओलीले सरकारले आतंकवादलाई प्रोत्साहित गरिरहेको ओलीले आरोप लगाए।
‘डिएसपीले असामाजिक, अमानवीय, असंवैधानिक, गैरकानुनी क्रियाकलापमा साथ दिन्न भने, साथ दिन सक्दिनँ भनेका हुन्। उनले समाजमा शान्ति सुव्यवस्था, एकताको पक्षमा कुरा गरेका हुन्। त्यो कुरा सहन नसकेर तिमीलाई त मार्छौं नै, तिम्रा बालबच्चा, परिवार सबलाई पनि मार्छौं आदि इत्यादि भन्ने!,’ उनले भने, ‘यो आतंकवादबाहेक केही होइन, यो आतंककारी क्रियाकलापबाहेक केही होइन।’
सरकारले किटेरै सपरिवार मार्छु भन्दा पनि नियन्त्रणमा लिन नसक्नु कमजोरी भएको बताए। केही दिनअघि पक्राउ परेका नुवाकोटका श्यामबहादुर सापकोटाले कांग्रेस सहमहामन्त्री महेन्द्र यादवलाई आक्रमण गर्नुपूर्व खुकुरी हान्छु भन्दै हिँडेको बताए।
‘यहाँ खुकुरी हान्ने मानिसले त माइतीघर मण्डलमा खुकुरी हान्छु भनेकै थियो त! दुई–चार दिन, कति दिन अगाडि नै, खुकुरी हान्छु भनेको थियो। लात्ती हान्छु भनेर यति माथि खुट्टा उचालेकै थियो, अनेक गरेको थियो त उसले,’ उनले भने, ‘मानिसहरूको नाम लिएको थियो, मान्छेको नाम लिएर काट्छु भन्दाखेरि सरकार कानमा तेल हालेर बसेको थियो।’
एमालेले सोमबार तेजाब आक्रमणविरूद्धको दिवसका अवसरमा पार्टी कार्यालयमा कार्यक्रम आयोजना गरेको थियो। कार्यक्रममा तेजाब आक्रमणमा परेकाहरू पनि सहभागी थिए।
