काठमाडौँ । प्रधानमन्त्री एवं नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले सत्ता गठबन्धनलाई तोड्न धेरै कसरत भइरहेको बताएका छन् ।
माओवादी केन्द्रको उपत्यका विशेष प्रदेश समितिले मंगलबार राखेको प्रशिक्षण कार्यक्रमलाई सम्बोधन गर्दै अध्यक्ष दाहालले यस्तो दाबी गरेका हुन् ।
अध्यक्ष प्रचण्डले भने, ‘यो गठबन्धन तोड्न धेरै कसरत भएका छन्, तर कसैको केही लाग्ने मैले देखेको छैन ।’
यस्तै, अध्यक्ष दाहालले सरकारविरुद्ध जति षड्यन्त्र हुन्छ त्यति गठबन्धन तोड्नमा लाग्नेहरु जनताको नजरमा गिर्दै जाने दाबी समेत गरे । उनले भने, ‘ठूलो दुर्घटना भएन भने यो गठबन्धन ५ वर्ष जानेछ । गठबन्धन तोड्न जति बल गर्छन्, त्यति नै जनताको नजरमा गिर्दै जाने छन् ।’
प्रधानमन्त्री प्रचण्डले नक्कली भुटानी शरणार्थी प्रकरण, ललिता निवास र सुन तस्करी सञ्जाल तोड्न गरिएको प्रयास समाजवाद र समृद्धिको आधार तयार पार्ने अभियान भएको बताए ।
