काठमाडौँ। आज मंगलबार बस्ने भनेको सर्वदलीय बैठक भोलि बिहानसम्मका लागि स्थगित भएको छ।
सुन प्रकरण छानबिन गर्न जाँचबुझ आयोग बनाउने आधार तय गर्न भन्दै बनाइएको कार्यदलले मस्यौदा बुझाउने र सर्वदलीय बैठकले त्यसलाई अन्तिम रूप दिने भन्दै आजलाई बोलाइएको सर्वदलीय बैठक बुधबार बिहान ११ बजे बस्न लागेको हो। प्रमुख प्रतिपक्षी दल नेकपा एमालेका अध्यक्ष केपी शर्मा ओली नआएपछि बुधबार बिहान ११ बजेसम्मका लागि स्थगित भएको एमाले संसदीय दलका उपनेता सुवासचन्द्र नेम्वाङले जानकारी दिए।
अन्य नेताहरू सर्वदलीय बैठकस्थलमा उपस्थित भएका थिए। तर, ओली आउन ढिला गरेपछि प्रधानमन्त्री पुष्पकमल दाहालले ओलीलाई दुई पटक टेलिफोन गरेको र ओली विरामी भएर आउन नसक्ने भएपछि भोलिसम्मलाई स्थगित गरिएको नेम्वाङले जानकारी दिए।
मंगलबारको बैठकमा कार्यदलले मस्यौदा बुझाउने र सर्वदलीय बैठकले त्यसलाई अन्तिम रूप दिने सोमबार रातिको सर्वदलीय बैठकमा सहमति जुटेको थियो। सोमबार सत्ता र प्रतिपक्षी दलहरूले सुन प्रकरण छानबिन गर्न जाँचबुझ आयोग बनाउने सहमति गरेका थिए।
मंगलबार जाँचबुझ आयोग बनाएर सदन चलाउने भने पनि संसद् बैठक पनि सूचना टाँसेर बुधबारसम्मका लागि स्थगित गरिएको हो।
