काठमाडौँ। नेपाली कांग्रेसका प्रवक्ता तथा अर्थमन्त्री डा. प्रकाशशरण महतले सांसद सुनिल शर्मा पार्टी अनुशासनभन्दा बाहिर गएको आरोप लगाएका छन्। पार्टी सदस्य भएपछि सबै अनुशासनमा बस्नुपर्ने उनको भनाइ छ।
कांग्रेस संसदीय दलको बैठकपछि पार्टीको सांसद सुनिल शर्माप्रति लक्षित गर्दै उनले यस्तो बताएका हुन्। संसदीय दलमा अनुशासन र मर्यादाबारे प्रश्न उठेको उनले बताए।
शर्माले प्रधानमन्त्री प्रचण्ड र गृहमन्त्री नारायणकाजी श्रेष्ठलाई नहटाए देश तस्करहरूको अखडा बन्ने र उनीहरूको विरोध गर्नेलाई जेल हाल्ने दाबीसमेत गरेका थिए।
‘संसदीय दलमा अनुशासन र मर्यादाको कुराबारे पनि प्रश्न उठेका छन्। के बोल्नु हुन्छ के हुँदैन भन्ने कुरा उठेका छन्,’ बैठकपछि उनले भने, ‘संस्थाको अभ्यास गर्दै आएको भएपनि त्यो नर्म्समा बस्न सक्नुपर्छ। पार्टीका सबै सदस्यले त्यो नर्म्समा बसेर कुरा गर्नुपर्छ।’
शर्माले आइतबार बिहान मात्र एमाले अध्यक्ष केपी शर्मा ओलीलाई भेटेर कांग्रेस र एमालेको सरकार निर्माणको पहल थाल्न आग्रह गरेका थिए।
