रकम माग्दा व्यवसायीलाई गिरफ्तार गर्नु सरकारको अधिनायकवाद – सचेतक बर्तौला

काठमाडौँ । नेकपा एमालेका सचेतक महेश बर्तौलाले सरकार अधिनायकवादतर्फ उन्मुख भएको आरोप लगाएका छन् । उनले शान्तिपूर्ण आन्दोलनमा रहेका निर्माण व्यवसायीमाथि आज चरम दमन र गिरफ्तार गर्नु सरकारको अधिनायकवाद भएको बताएका हुन् ।

भुक्तानी नदिएको भन्दै सडक विभाग र सिँचाइ विभागमा निर्माण व्यवसायीले ताला लगाउन खोजेपछि उनीहरुलाई प्रहरीले नियन्त्रणमा लिएको छ । यसै सन्दर्भमा सचेतक बर्तौलाले सरकारको क्रियाकलापको सबैले विरोध गर्नुपर्ने बताएका हुन् ।

सचेतक बर्तौलाले भनेका छन्, ‘सार्वजनिक निर्माण कार्य गरेबापत सरकारबाट पाउनुपर्ने अर्बौं रकमको माग गर्दै शान्तिपूर्ण आन्दोलनमा रहेका निर्माण व्यवसायीमाथि आज चरमदमन र दर्जनौंलाई गिरफ्तार गर्नु सरकारको अधिनायकवाद हो । सबैले विरोध गरौं ।’