काठमाडौँ। कानुन, न्याय तथा संसदीय मामिलामन्त्री धनराज गुरुङले सामन्तवादको अवशेषका रूपमा मिटरब्याजी भेटिएको बताएका छन्। बिहीबारको राष्ट्रियसभामा बोल्दै मन्त्री गुरुङले यस्तो बताएका हुन्।
प्रतिनिधिसभाले सन्देशसहित पठाएको मिटरब्याजसम्बन्धी मुलुकी देवानी संहितासहित केही नेपाल ऐन संशोधनका विषयमा बिहीबार राष्ट्रियसभालाई जानकारी गराउँदै उनले यस्तो बताएका हुन्। लोकतन्त्रपछि समान्तवाद ढल्यो भनेर बसिए पनि त्यसले फेरि शिर उठाएको उनले उल्लेख गरे।
‘हामी त लोकतन्त्र आएपछि सामन्तवाद ढल्यो भन्नेमा थियौँ। तर, मिटरब्याजका नाममा सामन्तवाद जरा गाडेर बसेको रहेछ,’ मन्त्री गुरुङले भने, ‘तर पनि म मन्त्री पीडितको पक्षमा उभिनैपर्छ। राष्ट्रियसभा पीडितको पक्षमा उभिनैपर्छ। सिंगो देश र सरकार पीडितको पक्षमा उभिन्छ।’
राष्ट्रियसभामा उत्पत्ति हुँदा अनुचित लेनदेन (मिटरब्याज)सम्बन्धी विधेयक अध्यादेश प्रतिस्थापनका रूपमा आएपछि प्रक्रियामा भएको ढिलाइलाई प्रतिनिधिसभाले विधेयकका रूपमा पारित गरेको उनले जानकारी दिए।
