काठमाडौं । करिब एक क्विन्टल सुन प्रकरणप्रति नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले गृहमन्त्री नारायणकाजी श्रेष्ठमाथि नै प्रश्न उठाएका छन् ।
एक साता लामो कम्बोडिया भ्रमण सकेर स्वदेश फर्किएका ओलीले विमानस्थलमा आक्रोश पोख्दै भने, ‘मान्छेहरू फ्रस्टेड किन हुन्छन् भने नारायणकाजी श्रेष्ठ गृहमन्त्री हुनुहुन्छ आफू, उहाँले यहाँ सेक्युरिटीको बन्दोवस्त गरेको छ कि छैन ? विमानस्थलमा सेक्युरिटी गर्ने काम उहाँको हो कि होइन ? यहाँको आउने जाने चिजहरूको निरीक्षण गर्ने काम उहाँको हो कि होइन ?’
ओलीले सुन काण्डमा आफ्नो संलग्नता रहे, नरहेको स्पष्ट पार्न पनि गृहमन्त्री श्रेष्ठलाई आग्रह गरेका छन् । गृहमन्त्रीको क्रियाकलाप अत्यन्तै गैरजिम्मेवार रहेको भन्दै उनले भने, ‘गृहमन्त्रीले बताउनुपर्यो, उहाँको संलग्नता छ छैन यसमा ? सानोतिनो संलग्नतामा त यो काम भएको छैन होला ? उहाँको चाहिँ संलग्नता छ कि छैन ? छैन भने कसको संलग्नता छ ?’ ओलीले प्रश्न गरे ।
यस प्रकरणमा जो कोही संलग्नता भएपनि उम्किन नहुने ओलीको भनाई छ । उनी यही साउन २ सोमबार निर्वाचन पर्यवेक्षणका लागि कम्बोडिया प्रस्थान गरेका थिए । भ्रमणमा राधिका शाक्य, उपमहासचिव विष्णु रिमाल र सचिवालय टोलीसहित छ जनाको सहभागिता रहेको थियो ।
कम्बोडियामा अध्यक्ष ओलीले त्यहाँका प्रधानमन्त्री सामदेक टेचो हुन सेनसँग भेटवार्ता गरेका थिए । साथै ओलीले श्रीलङ्काका पूर्वराष्ट्रपति मैत्रीपाला सिरिसेना र नाइजेरियाका पूर्वराष्ट्रपति जोनाथन गुडलकसँग पनि भेटवार्ता गरेका थिए ।
