बेनुका बनिन् तेह्रथुम युके टयालेन्ट हन्ट विजेता

• बिहीबार, २१ आषाढ, २०७५
• 3 years ago
• युके

दिनेशकुमार परियार, लन्डन ।  तेह्रथुम समाज युकेले युवाहरुको सहभागिता बढाउँदै यस वर्षको वार्षिक भेटघाट शनिबार सम्पन्न गरेको छ । बेलायतमा हुने गरेको कार्यक्रममा नेपाली युवाहरुको सहभागिता कम हुंदै गएपछि समाजले युवा सहभागिलाई आकर्षण गर्न आफनो नवौं वार्षिकोत्सव तथा भेटघाट कार्यक्रम सहित ट्यालेन्ट हन्टको पनि अयोजना गरेको हो । 

 

समाजकै भातृसंस्था तेह्रथुम युथ सोसाइटीले संयोजन गरेको ट्यालेन्ट हन्टमा बेनुका फोम्बोले नृत्यवापत प्रथम पुरस्कार हासिल गरेकी थिइन् । सबै उमेर समूहका प्रतिभाहरुले भाग लिएको प्रतियोगितामा  भवानी लिम्बूको समूहले च्याब्रुङ नृत्यमा दोश्रो पुरस्कार हात पारेका थिए भने नेपाली गीतमा नृत्य गरेर रेशा लिम्बूले तेश्रो पुरस्कार जितेकी थिइन् ।

 

चर्चित गायक दीपक लिम्बू, तारा लक्सम, शुसी गुरुङ र प्रनेश लिम्बूले निर्णायकको भूमिका निर्वाह गरेका थिए । अविभावक, चेलीबेटी र व्यवसायीहरुले पुरस्कार राशी प्रायोजन गरेका थिए । प्रथम पुरस्कार ६०० पाउण्ड रहेको थियो भने दोश्रो र तेश्रो क्रमशः ४०० र २०० पाउण्ड रहेको थियो ।

 

 

बेलायतमा पुनर्वास भएपछि संस्कार र संस्कृति हराउन लागेको भन्दै चिन्ता लिएका युवाहरुले कार्यक्रमको सोच ल्याएपछि अविभावकहरुले कार्यक्रमको चांजोपांजो मिलाइदिएका हुन् ।

 

कार्यक्रममा इलाम समाज युकेका अध्यक्ष गोपाल गिरी, ताप्लेजुङ समाज युकेका उपाध्यक्ष यामबहादुर आङ्बोहाङ, पांचथर समाज सेवा युकेका अध्यक्ष चन्द्र सुन्दास र  धनकुटाका अध्यक्ष पूर्ण फाःलेच्छाको उपस्थिति रहेको थियो । कार्यक्रममा चर्चित युवा ब्लगर लेक्स लिम्बू, नेपाल आदिवासी जनजाति पत्रकार महासंघका महासचिव खुशी लिम्बू, गैरआवासीय नेपाली संस्था युकेका उपाध्यक्ष शुसिला राईको समेत उपस्थिति थियो ।

 

अल्डरसटस्थीत एम्पायर ब्याङ्केटिङको हलमा सम्पन्न उक्त ट्यालेन्ट हन्टमा तेह्रथुमबाट युके आएका वयोबृद्ध नरबहादुर लिम्बू प्रमुख अतिथी रहेका थिए । तेह्रथुम समाज युकेका अध्यक्ष सुर्य खापुङको सभापतित्व रहेको कार्यक्रमको पहिलो  सत्र संस्थाका महासचिव डम्मर लिम्बुले सञ्चालन गरेका थिए । प्रतियोगिताको संचालन भने  एलिना इम्सङ र सिकुम हुक्पाचोङबाङले गरेका थिए ।

 

 

ग्लोबल नेपालीपत्रमा प्रकाशित कुनै समाचारमा तपाईंको गुनासो भए हामीलाई info@nepalipatra.com मा इमेल गर्न सक्नुहुनेछ । साथै तपाई आफ्नो बिजनेश प्रवद्र्धन गर्न चाहनुहुन्छ भनेsales@nepalipatra.com सम्पर्क गर्न सक्नुहुनेछ । हामीसँग तपाईंफेसबुक रट्विटरमा पनि जोडिन सक्नुहुन्छ ।