काठमाडौँ। राष्ट्रिय स्वतन्त्र पार्टी (रास्वपा)ले उपप्राध्यापक प्रेम चलाउनेविरुद्ध ज्यान मार्ने उद्योग अन्तर्गत मुद्दा खेपिरहेका नेविसंघका कार्यकर्ताहरूको मुद्दा फिर्ता लिने सरकारको निर्णयप्रति आपत्ति जनाएको छ। मंगलबार प्रतिनिधिसभा बैठकमा शून्य समयमा बोल्दै रास्वपाका प्रमुख सचेतक सन्तोष परियारले सरकारको निर्णयप्रति आपत्ति जनाएका हुन्।
सांसद परियारले उपप्राध्यापक चलाउनेलाई न्याय दिन र पीडिक नेविसंघका विद्यार्थीहरूलाई दण्डित गर्न पनि सरकारसँग माग गरेका छन्।
सांसद परियारले त्रिभुवन विश्वविद्यालयका समाजशास्त्रका उपप्राध्यापक चलाउनेलाई विश्वविद्यालय परिसरमै मरनासन्न हुने गरी कुटपीट गर्नेहरूलाई कडाभन्दा कडा कारबाही गर्नुको सट्टा उनीहरुमाथि लगाइएको मुद्दासमेत फिर्ता लिने काम गरेर सरकारले अन्याय गरेको भन्दै आक्रोश व्यक्त गरे।
‘२०७७ साल आसोज २० गते त्रिभुवन विश्वविद्यालय समाजशास्त्रका प्रोफेसर आफ्नो एटीएममा भएको पैसा झिक्न जान्छन्। तत्समयमा नेविसंघ निकट विद्यार्थीहरूले फलामको रडले मरनासन्न हुने गरी कुटछन्। ३ वर्षसम्म धेरै ठाउँ जान्छन ती प्राध्यापक न्याय माग्न। भौतारिएर हिँडछन्,’ सांसद परियाले भने, ‘अहिले अन्ततः जेष्ठ ३० गते सरकारको मन्त्रीपरिषदले उक्त मुद्दा फिर्ता लिने निर्णय गर्छ। हामी कुनै बेला नेपाललाई शान्ति क्षेत्र भन्दथ्यौँ। आज कमसेकम विश्वविद्यालयहरू शान्ति क्षेत्र हुन भन्ने हाम्रो अवधारणगत बुझाइ हो। प्रहरीले पनिभित्र जान पाउँदैन भन्ने हाम्रो शान्तिको मान्यतालाई गण्डागर्दीको शैलीमा दिनदहाडै त्यसरी कुटपिट गरेर मरनासन्न बनाएको मान्छेको मुद्दा फिर्ता लिने यो कहाँको न्याय हो? न्याय चाहिन्छ। न्यायलाई मर्न नदिऊ। न्याय पनि मर्यो भने हाम्रो आशा रहँदैन। विश्वविद्यालयजस्तो क्षेत्रमा त्यसरी गुण्डागर्दी शैलीमा मरनासन्न हुने गरी कुटनेहरुलाई नछोडौँ। म सम्माननीय सभामुखमार्फत् नेपाल सरकारको गृहमन्त्रीलाई अनुरोध गर्न चाहन्छु। कृपया, यो गल्तीलाई सच्याउनूस। पीडितलाई न्याय दिनूस।’
