जोर्डन जान लागेका १५ जनालाई अध्यागमन कार्यालयले फर्कायो

काठमाडौँ। त्रिभुवन अन्तर्राष्ट्रिय विमानस्थलको अध्यागमन कार्यालयले जोर्ड जान लागेका १५ जनालाई फर्काएको छ। जोर्डन जान लागेका १३ महिला र २ पुरुषसहित १५ जना नेपाली कामदारलाई विमानस्थलबाटै अध्यागमन कार्यालयले फर्काएको हो।

अध्यागमनले उनीहरूको साथबाट भिसा फेला नपारेकाले फिर्ता पठाउनु परेको विमानस्थलस्थित अध्यागमन कार्यालयका प्रमुख अध्यागमन अधिकृत रामबन्धु सुवेदीले जानकारी दिए।

उनीहरु आइतबार बिहान बिनाभिसा जोर्डन जान लागेकाले उनीहरूलाई अध्यागमनले विमानस्थलबाट फर्काएको हो। एयर अरेबियाको जहाजबाट उनीहरू बिहान साढे १० बजे जोर्डनतर्फ जान लागेका थिए।

भिसा नभए पनि उनीहरुसँग श्रम स्वीकृति भने थियो। त्यस्तै, जोर्डनको आन्तरिक मन्त्रालयले लेखेको पत्र पनि उनीहरुसँग थियो।