कोशी प्रदेश सरकारविरुद्धको रिट श्रेष्ठको इजलासमा

काठमाडौँ। कोशी प्रदेश सरकारविरुद्धको रिटको सुनुवाइ आज सर्वोच्च अदालतका न्यायाधीश तिलप्रसाद श्रेष्ठको इजलासमा परेको छ।

रिटको सुनुवाइ १४औँ नम्बरमा रहेको छ। यसअघि दुईपटक सुनुवाइ तोकिए पनि ‘हेर्न नभ्याउने’ हुँदै स्थगित भएको थियो।

गएको बिहीबार सभामुख समेतलाई समेटेर प्रदेश सरकार गठन गरिएपछि नेकपा एमालेका तर्फबाट रिट दायर गरिएको थियो। कोसीका निर्वतमान मुख्यमन्त्री तथा एमाले संसदीय दलका नेता हिक्मतकुमार कार्कीले संविधानविपरीत सरकार गठन गरिएको भन्दै रिट दायर गरेका हुन्।

रिटमा हालै नियुक्त भएका मुख्यमन्त्री उद्धव थापा, प्रदेश प्रमुख पर्शुराम खापुङ र प्रदेशसभाका सभामुख बाबुराम गौतमलाई विपक्षी बनाइएको छ।