काठमाडौँ। सट्टाबाजी गर्ने ‘वान एक्स बेट’को प्रचार गरेको आरोपमा पक्राउ परेका कलाकार तथा युट्युबरहरुविरुद्ध काठमाडौँ जिल्ला अदालतमा आइतबार अभियोग पत्र दायर भएको छ। सट्टाबाजीसम्बन्धी कसूर र नेपाल राष्ट्र बैंक ऐन, २०५८ अन्तरगतको कसूरमा कूल ११ जनाविरुद्ध मुद्दा दायर भएको हो।
दिनेश खड्का, अनिता धिमालसहित जलन घर्तिमगर, अलिश राई, गणेश देवकोटा, बेगम नेपाली, मरिचमान श्रेष्ठ, राजु पौडेल, रोशन खतिवडा, सरोज घिमिरे र कुशल पोखरेल (फरार) विरुद्ध मुद्दा दायर गरिएको छ।
अभियोग पत्रमा सबै कलाकार र युट्युबरहरुले विज्ञापनबापत पैसा पाउने भनेपछि आफ्नो युट्युब च्यानलहरूमा वान एक्स बेटको प्रचार गरेको बयान दिएको उल्लेख छ। उनीहरुले विज्ञापनबापत ९० हजार रुपैयाँसम्म आर्थिक लाभ लिएको स्वीकार गरेका छन्।
उनीहरूलाई इमेल र टेलिग्राममार्फत विज्ञापन राख्ने अफर आएको बयान बताएका छन्। सबैलाई १५–२० सेकेन्डको विज्ञापन बजाउँदा मासिक १५ देखि ४० हजार रुपैयाँ पाउने अफर गरिएको थियो।
