ललिता निवास जग्गा प्रकरणमा चार पूर्वसचिवसहित ४०६ विरुद्ध पक्राउ पुर्जी

काठमाडौँ । बालुवाटारस्थित ललिता निवास जग्गा हिनामिना प्रकरणमा ४०६ जना विरुद्ध पक्राउ पुर्जी जारी भएको छ । जसमध्ये चार जना पूवसचिव समेत छन् ।

सरकारी जग्गा व्यक्तिका नाममा गर्ने काममा संलग्न भएको भन्दै तत्कालीन सचिवहरु दीप बस्न्यात, छविराज पन्त, दिनेशहरि अधिकारी र नारायण गोपाल मलेगो विरुद्ध पक्राउ पुर्जी जारी भएको हो । हाल पूर्वसहसचिव सुधीर शाह पक्राउ परिसकेका छन् । साथै, अख्तियार दुरुपयोग अनुसन्धान आयोगका पूर्वप्रमुख आयुक्तसमेत रहेका दीप बस्न्यात फरार छन् ।

प्रहरीका अनुसार उक्त प्रकरणमा हालसम्म ४०६ जनाविरुद्ध अदालतबाट पक्राउ पुर्जी जारी भएको छ । ११२ रोपनी ४ आना एक पैसा जग्गा हिनामिना प्रकरणमा चार वटा मुद्दामा प्रहरीले अनुसन्धान गरिरहेको छ । दिनेशहरि अधिकारी र नारायण गोपाल मलेगो यही मुद्दामा जोडिएका हुन् ।

२०४९ सालदेखि २०६९ सालको अवधिमा ललिता निवासको १४३ रोपनी भन्दा बढी जग्गा हिनामिना भएको हो ।