मौसमका कारण प्रधानमन्त्री प्रचण्ड चढेको हेलिकोप्टर ताप्लेजुङ नपुगी फर्कियो

काठमाडौँ। बाढी प्रभावित क्षेत्रमा जान लागेका प्रधानमन्त्री पुष्पकमल दाहाल प्रचण्डसहितको टोली चढेको हेलिकोप्टर खराब मौषमको कारण फर्किएको छ। बाढी प्रभावित ताप्लेजुङ जान लागेको नेपाली सेनाको हेलिकोप्टरबीच बाटोबाट फर्केको हो।

अविरल वर्षासँगै शनिबार आएको बाढी र पहिरोका कारण प्रभावितको अवस्था बुझ्न कोशी प्रदेश पुगेका प्रधानमन्त्री प्रचण्ड खराब मौसमका कारण विराटनगर फर्किएका हुन्। प्रधानमन्त्री सहितको टोली हेलिकप्टरमा संखुवासभा पुगेका थिए। त्यहाँबाट पाँचथर जाने भन्दै हिडेका थिए।

तर खराब मौसमका कारण सेनाको हेलिकप्टर पाँचथरमा अवतरण हुन सकेन्। ताप्लेजुङको मौसम पनि खराब भएका कारण आकश्मिक रुपमा हेलिकप्टर विराटनगर विमानस्थलमा अवतरण भएको थियो।

विराटनगरमा नेपाली सेनाको हेलिकप्टरमा अवतरण भएका प्रचण्ड विराटनगर हुँदै जहाज चढेर काठमाडौँ फर्किएका हुन्।