काठमाडौँ । लुम्बिनी प्रदेशबाट शुरु भएको युएसएड यात्रा काठमाण्डौको कीर्तिपुरमा आएर सम्पन्न भएको छ । नेपालको समृद्धिका लागि भइरहेको योगदान तथा पहलबारे जानकारी दिन अमेरिकी अन्तर्राष्ट्रिय विकास सहयोग नियोग (युएसएड)को दुई हप्ताअघि यात्रा शुरु गरेको थियो ।
यही असार १९ गतेदेखि कपिलवस्तुको वाणगङ्गाबाट शुरु भएको यात्रा बुटवल, दाङको लमही, कोहलपुर, नेपालगञ्ज, काठमाण्डौको भृकुटीमण्डप तथा ललितपुरको जावलाखेलमा सम्पन्न भएपछि हिजो कीर्तिपुरको पांगामा आयोजना गरिएको हो ।
विभिन्न कलाकारको प्रस्तुतिका साथै विभिन्न खेल जस्तै ‘स्पिन द ह्विल’, हाजिरीजवाफ लगायत मनोरञ्जनका कार्यक्रम आयोजना गरिएका थिए । खेलमा सहभागिता जनाउने अधिकांश युवाहरु तथा सांगीतिक कार्यक्रममा सबै उमेर समूहका दर्शक सहभागी थिए ।
युसएडको सहयोगमा भएका विभिन्न कार्यक्रमबारे जानकारी दिन यात्रा शुरु गरिएको हो । युएसएडले स्वास्थ्य, शिक्षा, आर्थिक वृद्धि, वातावरण, लोकतन्त्र, अधिकार र सुशासनका क्षेत्रमा राष्ट्रिय र स्थानीयस्तरका विभिन्न परियोजना सञ्चालन गरिरहेको छ । यस्तो यात्रा भने पहिलो पटक गरेको हो ।
