एकीकृत समाजवादीको अध्यक्षमा माधवलाई भुसालको चुनौति !

काठमाडौँ । नेकपा एकीकृत समाजवादीको महाधिवेशन नजिकिदै गर्दा नयाँ नेतृत्वका लागि दौडधुप जारी छ ।

अध्यक्षको लागि माधवकुमार नेपालले फेरि इच्छा व्यक्त गरिरहेका छन् । त्यस्तै, महासचिव घनश्याम भुसालले पनि इच्छा देखाएका छन् । भुसाललाई वरिष्ठ नेता झलनाथ खनाल साथ दिने भएका छन् । खनाल र महासचिव भुसालले छलफल गरेका छन् । खनाल निवास डल्लुमा भएको छलफलमा मिलेर जाने सहमति भएको दाबी गरिएको छ ।

खनाल र भुसाल एक ठाउँमा आएमा अध्यक्ष नेपाललाई भुसालले अध्यक्षमा चुनौती दिनेछन् । तर, यसबारेमा कुनै औपचारिक निर्णय भने आएको छैन ।

महाधिवेशन असार १६ देखि २० गतेसम्म काठमाडौँमा हुनेछ । महाधिवेशनमा १९ पदाधिकारीसहित १९९ सदस्यीय कार्यसमिति चयन हुदै छ । विद्यमान कमिटीमा ३५० सदस्यीय कार्यसमिति रहेकामा आकार घटाउन लागिएको हो । करिब एक हजार चार सय महाधिवेशन प्रतिनिधि पार्टीको तल्लो तहदेखि माथिल्लो तहसम्म निर्वाचित गरिएको जनाइएको छ ।