राष्ट्रियसभाबाट सुरक्षित कारोबार (पहिलो संशोधन) विधेयक पारित

काठमाडौँ । राष्ट्रियसभाले ‘सुरक्षित कारोबार (पहिलो संशोधन) विधेयक, २०८०’ सर्वसम्मतिले पारित गरेको छ । राष्ट्रियसभाको आजको बैठकमा अर्थमन्त्री वर्षमान पुनले उक्त विधेयक पेस गरेका हुन् ।

विधेयकमाथिको छलफलमा सांसद देवेन्द्र दाहाल र कमला पन्त सहभागी थिए । विधेयकमाथिको छलफलमा उठेका प्रश्नको जवाफ दिँदै अर्थमन्त्री पुनले विधेयकमा जनताको दैनिक कारोवार सुरक्षित गर्ने व्यवस्था रहेकोले विधेयक पारित भएसँगै यो थप व्यावहारिक र समयसापेक्ष बन्दै जाने बताए ।

त्यसैगरी बैठकमा सञ्चार तथा सूचना प्रविधिमन्त्री रेखा शर्माले राष्ट्रिय मानवअधिकार आयोगको २३औँ वार्षिक प्रतिवेदन र राष्ट्रिय प्राकृतिक स्रोत तथा वित्त आयोगको पाँचौँ वार्षिक प्रतिवेदन पेस गरेका थिए । राष्ट्रियसभाको बैठक असार १८ गते पुनः बस्नेछ ।