विराटनगर । कोशी प्रदेशका प्रदेश प्रमुख पर्शुराम खापुङले नयाँ सरकार गठनका लागि आह्वान गरेका छन् ।
वर्तमान मुख्यमन्त्री केदार कार्कीले अल्पमतमा परेको ३० दिन भित्र विश्वासको मत नलिएपछि प्रदेश प्रमुखले सरकार गठनको अन्तिम विकल्प संविधानको धारा १६८ को उपधारा ५ अनुसार बुधबार मध्यरातमा नयाँ सरकार गठनका लागि आह्वान गरेका हुन् । सरकार दाबी गर्नका लागि २८ बैशाखसम्मको समय दिइएको छ ।
२७ असोजमा कांग्रेसका आठ सांसदसहित विद्रोह गरेका केदार कार्की एमालेका ३९ जना सांसदको समर्थनमा उपधारा ५ अनुसार नै मुख्यमन्त्री नियुक्त भएका थिए ।
केन्द्रीय सत्तासमीकरण फेरिएपछि अल्पमतमा परेका मुख्यमन्त्री कार्की राजीनामा नदिने र विश्वासको मत नलिने अडानमा बसे । तर कार्की अल्पतमा परेको ३० दिनपछि महान्यायाधिवक्तासँग राय मागेर प्रदेश प्रमुख खापुङले नयाँ सरकार गठनको आह्वान गरे । नयाँ सरकार गठनको आह्वान गर्दा प्रदेशसभाले पास गरेको संकल्प प्रस्तावलाई आधार मानिएको छ ।
सरकार गठनको आह्वान भएपछि एमाले र माओवादी केन्द्रका ५२ सांसदको समर्थनमा एमाले संसदीय दलका नेता हिक्कमतकुमार कार्कीले दाबी पेश गर्ने तयारी गरेका छन् । भोलि दाबी पेश गर्ने तयारी भएको माओवादी केन्द्र संसदीय दलका नेता इन्द्रबहादुर आङ्बोले जानकारी दिए ।
९३ सदस्यीय प्रदेशसभामा बहुमतका लागि ४७ मत चाहिन्छ । एमाले (४०) माओवादी केन्द्र (१३)सँग ५३ जना सांसद छन् । उपसभामुख सृजना दनुवारलाई एमालेले सरकार गठनका लागि संख्या गणना गरेको छैन ।
