सुनसरीका ५ वटा पालिकामा कर्फ्यु हट्यो

काठमाडौँ । जिल्ला प्रशासन कार्यालय सुनसरीले गएको शुक्रवारदेखि पाँच वटा पालिकामा लगाएको कर्फ्यु हटाएको छ । गए राति १२ बजेदेखि कर्फ्यु हटाएको प्रमुख जिल्ला अधिकारी जयनारायण आचार्यले जानकारी दिए ।

दुई समूहबीचको विवाद बढेर झडप हुन थालेपछि सुनसरीको हरिनगर गाउँपालिका, देवानगञ्ज गाउँपालिका, इनरुवा नगरपालिका, कोशी गाउँपालिका र भोक्राह नरसिंह गाउँपालिकामा कर्फ्यु लागू भएको थियो ।

गएको शनिवार भएको सर्वदलीय बैठकमा दुवै पक्ष शान्त हुने सहमति भए पनि प्रदर्शन भएपछि कर्फ्युलाई निरन्तरता दिइएको थियो । कर्फ्यु हटे पनि पाँच वटै पालिकामा भेला, जुलुस गर्न प्रतिबन्ध लगाइएको सुनसरीका प्रमुख जिल्ला अधिकारी जयनारायण आचार्यले जानकारी दिए ।