उदयपुरमा भएको जीप दुर्घटनामा ज्यान गुमाउनेको सङ्ख्या ७ पुग्यो

काठमाडौँ । उदयपुरमा भएको जीप दुर्घटनामा ज्यान गुमाउनेको सङ्ख्या ७ पुगेको छ । धरानबाट भोजपुरको घोरेटार जाँदै गरेको जीप दुर्घटनामा परि ज्यान गुमाउनेको सङ्ख्या सात जना पुगेको हो ।

जिल्ला प्रहरी कार्यालय भोजपुरका अनुसार दुर्घटनामा परि एक बच्चा, तीन पुरुष र तीन महिलाको ज्यान गएको छ । को १ ज २५९३ नम्बरको जीप दिउँसो साढे १ बजेतिर उदयपुरको बेलका नगरपालिका–७ बाखाकुवामा दुर्घटना भएको हो ।

दुर्घटनामा परी घाइते भएका सात जनाको अहिले धरानमा रहेको बीपी कोइराला स्वास्थ्य विज्ञान प्रतिष्ठानमा उपचार भइरहेको प्रहरीले जनाएको छ । जीपमा १४ जना सवार थिए । ओरालो सडकमा क्षमताभन्दा बढी यात्रु भएकाले पनि दुर्घटना भएको हुनसक्ने प्रहरीको प्रारम्भिक अनुमान छ ।

चालक मानबहादुर बस्नेतबाहेक अन्य मृतकको परिचय खुल्न नखुलेको बताए। जीप सडकबाट तल खसेको प्रहरीले जनाएको छ ।