काठमाडौँ । सुनका गहना, गाडी र जग्गा कारोबार गर्ने भन्दै विश्वासमा पार्दै ठगेर भाग्ने ४ जनालाई काठमाडौँ उपत्यका अपराध अनुसन्धान कार्यालयले पक्राउ गरेको छ ।
उनीहरूले समूह बनाई सुनका गरगहना, गाडी र जग्गाको कारोबार देखाई विश्वासमा पार्ने र ठगी गरेको पाइएको प्रहरीले बताएको छ । प्रहरीका अनुसार उनीहरुले करिब ७ करोड रुपैयाँ ठगेका छन् ।
काभ्रेको भुम्लु गाउँपालिका– ३ का कुमार थापा, स्याङ्जाको पुतलीबजार नगरपालिका– ४ की मीना दमै, सिन्धुलीको गोलन्जोर गाउँपालिका– ५ का रविन कुमार थापा र सप्तरीको सप्तकोशी नगरपालिका– ६ का दिलिप कुमार लाभलाई पक्राउ गरेको हो ।
काभ्रेका कुमार थापाले सुनका गरगहना विदेशमा निर्यात गर्दैछौं भनेर पोखराका एक सुनचाँदी व्यवसायीसँग पहिलो पटक १० लाख, दोस्रो पटक २० लाख र तेस्रो पटक ३० लाखको गहना खरिद गरेका थिए । यसरी ठूलो मात्रामा सुन खरिद गरेर विश्वासमा पारेपछि १ करोड ८० लाख रुपैयाँको गहना बाहिर निर्यात गर्ने भनी लिएर फरार भएका उपत्यका अपराध अनुसन्धान कार्यालयका प्रहरी उपरीक्षक रवीन्द्र रेग्मीले जानकारी दिए ।
त्यस्तै दिलिपकुमार लाभले भक्तपुरको सुडालमा अरुको नाममा रहेको १२ आना जग्गा दिलाइदिने भनी परिवार अटो मोवाइलका सञ्चालकसँग ३ वटा गाडी र २६ लाख रुपैयाँ लिई भागेको पाइएको अपराध अनुसन्धान कार्यालयले जनाएको छ । परिवार अटोमोवाइल प्रालिबाट लिएको गाडी ५४ लाख ५० हजार मूल्य तय गरी लिएकामा रकम नतिरी भागेका थिए ।
यो समूहले चितवनमा पनि अरु व्यवसायीको जग्गा बैना गरी १ करोड ३६ लाख ठगी गरेको पाइएको थियो । मीना दमैविरुद्ध जिल्ला प्रहरी कार्यालय कास्कीमा ७ वटा ठगी मुद्दा र चितवनमा २ वटा ठगी मुद्दा दर्ता भएको छ ।
कुमार थापाविरुद्ध भने कास्कीमा २ करोड बैंकिङ कसुरको मुद्दा दर्ता भएको पाइएको अपराध अनुसन्धान कार्यालयले जनाएको छ । कुमार थापाले धेरै कारोबार मीना दमैको नामबाट गर्ने गरेको पाइएको छ । उनले महिलाको नाममा कारोबार गर्दा विश्वासमा पार्न सजिलो हुने भएकाले त्यो उपाय लगाएको देखिएको प्रहरी उपरीक्षक रेग्मीले बताए ।
रविनकुमार थापाविरुद्ध चितवनमा ४ वटा र काठमाडौँमा ३ वटा मुद्दा दर्ता भएको पाइएको छ ।
