धम्की दिएर ५ करोड माग्ने २ जना पक्राउ

काठमाडौँ । पोखराको दीपस्थित सच्चाइ केन्द्रका सञ्चालक प्रकाशदीप गैरेलाई धम्की दिएर ५ करोड रुपैयाँ फिरौती मागेको अभियोगमा प्रहरीले दुईजनालाई पक्राउ गरेको छ ।

जिल्ला प्रहरी कास्कीले बिहीबार पत्रकार सम्मेलन गरेर पर्वतको खुर्कोटका ३६ वर्षका लक्ष्मण दर्जी र आर्थरका दीपक बहादुर क्षेत्रीलाई पक्राउ गरेर सार्वजनिक गरेको हो ।
पक्राउ परेका ३६ वर्षीय लक्ष्मण दर्जी ४ वर्षदेखि कतारमा बस्दै आएका थिए। तर उनी एक महिनाअघि मात्रै वैदेशिक रोजगारीबाट घर फर्किएका थिए ।

उनीहरूले यही माघ १८ गतेदेखि पोखरा महानगरपालिका१६ लामाचौर निवासी सच्चाइ सेवा केन्द्रका सञ्चालक तथा सच्चाइ केन्द्र नेपालका केन्द्रीय अध्यक्ष गैरेलाई फोन र म्यासेजमार्फत् हिन्दी भाषा प्रयोग गरेर ५ करोड रुपैयाँ माग गरेका थिए ।

रकम नदिएमा परिवार तथा गैरेलाईसमेत उनीहरूले मार्ने धम्की दिएको कास्की प्रहरीले जनाएको छ । प्रहरीले अनुसन्धानका क्रममा पोखरा महानगरपालिका–८ सिमलचौरस्थित जाल्पा मन्दिरनजिकै डेरा गरी बस्ने दुवैजनालाई धम्की दिन प्रयोग गरेको सिमकार्डसहितको मोबाइल फोनसहितका सामानसहित बुधबार पक्राउ गरेको हो । प्रहरीले उनीहरूबाट भारतीय नम्बरको सिमकार्ड पनि बरामद गरेको छ ।