काठमाडौँ । काठमाडौँ महानगरपालिकाले न्यूरोड क्षेत्रको सडकमा पार्किङ निषेध गरेको सो क्षेत्रका व्यवसायीहरु आज पनि प्रदर्शन गरेका छन् । उनीहरु पसल बन्द गरेर ११ बजेतिरबाटै काठमाडौँ महानगरपालिका विरोधमा उत्रिएका हुन् ।
महानगरले मंगलबारदेखि धर्मपथ, जुद्ध सालिकदेखि इन्द्रचोक तर्फको सडकखण्ड, खिचापोखरी, महाबौद्ध, वीर अस्पताल वरपरको कालोपत्र सडकमा पार्किङ निषेध गरेको छ । पार्किङ निषेध गर्दा व्यापार घट्ने भन्दै व्यवसायीहरुले प्रदर्शन गरेका हुन् ।
स्थानीय सामाजिक संघ संस्था, व्यवसायिक संघ संस्था र सरोकारवाला सम्मिलित संघर्ष समिति बनाएर उनीहरुले आन्दोलन गरेका हुन् । महानगरले सरोकारवालासँग परामर्श नगरी पार्किङ निषेधको निर्णय लादेको उनीहरुको आरोप छ ।
पार्किङ हटाउने निर्णयले व्यवसायी, स्थानीय तथा सेवाग्राही अन्यायमा परेको र न्यूरोडको व्यवसायिक भविष्य संकटमा पर्ने उनीहरुको भनाइ छ ।
