चन्द्रागिरिमा भएको कार दुर्घटनामा मृत्यु हुनेको संख्या ५ पुग्यो

काठमाडौँ । चन्द्रागिरिमा भएको कार दुर्घटनामा घाइते बालिकाको उपचारका क्रममा मृत्यु भएको छ । शनिबार दिउँसो सवा १ बजे प्र. ३–०१–२३ च ६९८५ नम्बरको गाडी पानीघाटभन्दा माथि हिमचुली सेतो पहरास्थित सडकबाट करिब ५ सय मिटर तल खसेर दुर्घटना भएको थियो ।

दुर्घटनामा परी ४ जनाको घटनास्थलमै मृत्यु भएको थियो । यस्तै दुर्घटनामा गम्भीर घाइते भएकी ६ वर्षीया स्मारिका गौतमको पनि उपचारको क्रममा मृत्यु भएको छ । योसँगै दुर्घटनामा मृत्यु हुनेको संख्या ५ जना पुगेको छ । कारमा ६ जना सवार थिए ।

उनकी आमा डा. सृष्टी तिवारी गौतम भने सकुशल रहेको प्रहरीले जनाएको छ । कारमा सवार काठमाडौँ महानगरपालिका– ३० मैतिदेवीका ६७ वर्षीय ओमकार निधि तिवारी, ६४ वर्षीया कल्पना तिवारी, काठमाडौँ महानगरपालिका– २ लाजिम्पाटका ३८ वर्षीय डा. महेश कुमार गौतम र ४ वर्षीय प्रियान्स गौतमको घटनास्थलमै मृत्यु भएको थियो ।

मृतकहरूको शव पोस्टमार्टमका लागि त्रिवि शिक्षण अस्पताल लगिएको छ ।