कोशीमा सभामुखका लागि १ बजेसम्म मनोनयन, ३ बजे मतदान

विराटनगर । कोशी प्रदेशको सभामुखका लागि प्रदेशसभा सचिवालयले निर्वाचन कार्यतालिका सार्वजनिक गरेको छ । ३ बजे सभामुखका लागि निर्वाचन समय तोकेर सचिवालयले कार्यतालिका सार्वजनिक गरेको हो ।

मनोनयनका लागि बिहान साढे ११ बजेदेखि १ बजेसम्मका लागि समय तोकिएको छ । १ बजे उम्मेदवारका नामावली प्रकाशन हुनेछ । त्यसपछि आधाघण्टा दाबी विरोधका लागि समय तोकिएको छ ।

दिउँसो २ः३० बजे उम्मेदवारको अन्तिम नामावली प्रकाशन गर्ने कार्यतालिका छ । दिउँसो ३ बजेबाट मतदान गर्ने कार्यसूची रहेको प्रदेशसभा सचिव गोपालप्रसाद पराजुलीले जानकारी दिए ।

१६ साउनदेखि रिक्त रहेको सभामुखमा राष्ट्रिय प्रजातन्त्र पार्टी राप्रपाका सांसद अम्बरबहादुर विष्ट निर्विरोध निर्वाचित हुँदैछन् ।

सत्तारुढ गठबन्धनको समर्थनमा उम्मेदवार बनेका उनलाई एमालेले पनि समर्थन गर्ने निर्णय गरेपछि निर्विरोध सभामुख बन्ने भएका हुन् । नेकपा एमाले सांसद लिलाबल्लभ अधिकारीका अनुसार विष्टलाई एमालेले पनि समर्थन गर्नेछ । मंगलबार विहान बसेको बैठकले समर्थन गर्ने निर्णय गरेको उनले बताए ।