काठमाडौँ । ललितपुरको बालकुमारीमा प्रहरीले चलाएको गोली लागेर घाइते भएका अर्का एकजना युवाको पनि मृत्यु भएको छ । नेपाल प्रहरीका प्रवक्ता कुवेर कडायतका अनुसार मृत्यु हुनेमा डोटीका वीरेन्द्र शाह रहेका छन् ।
उनको पाटन अस्पतालमा उपचारका क्रममा मृत्यु भएको हो । सोही घटनामा अर्का घाइते दैलेखका सुजन राउतको मृत्यु भइसकेको छ । अर्का एकजना युवा पनि गम्भीर घाइते अवस्थामा रहेको प्रहरीले बताएको छ।
प्रहरीले २३ जना प्रदर्शनकारीहरूलाई नियन्त्रणमा लिएको छ ।
शुक्रबार अपरान्ह भौतिक,पूर्वाधार तथा यातायात मन्त्री प्रकाश ज्वालाको गाडीमा आगजनी गरेपछि उत्पन्न परिस्थितिलाई नियन्त्रणमा लिन प्रहरीले अश्रुग्यास र गोली चलाएको थियो । सोही क्रममा करिब एक दर्जन बढी प्रदर्शनकारी घाइते भएका छन् ।
उनीहरूको पाटन र किष्ट अस्पतालमा उपचार भइरहेको छ ।
कोरियन भाषा परीक्षाको विषयलाई लिएर विरोध प्रदर्शमा उत्रिएका युवाहरूले मन्त्री सवार गाडीमा आगजनी गरेका थिए ।
