शासकीय सुधार आयोग गठन गर्ने तयारी भइरहेको छः प्रधानमन्त्री

काठमाडौँ। प्रधानमन्त्री पुष्पकमल दाहाल प्रचण्डले शासकीय सुधार आयोग गठन गर्ने तयारी भइरहेको बताएका छन्। बुधबार ललितपुरमा प्रधानमन्त्री तथा मन्त्रिपरिषद्को कार्यालयले आयोजना गरेको ‘नेपालको अर्थतन्त्र र शासकीय सुधारको विषयक अन्तक्रिया कार्यक्रम’मा प्रधानमन्त्री प्रचण्डले आयोग गठन गरिने बताएका हुन्।

शासकीय प्रणाली सुधार गर्नेबारे छलफल थालेको र शासकीय सुधार आयोग गठन गरेर आवश्यक समीक्षा गरिने प्रधानमन्त्रीको भनाई छ। यसपटक सरकारको नेतृत्व गर्दै जाँदा प्रशासनको सुधारमा ध्यान केन्द्रीत रहेको र अहिलेसम्मका आउँदा विविध कारणले खासै प्रगति नदेखिएको उनको भनाइ छ।

प्रधानमन्त्री दाहालले पहिलोपटक सचिवहरूलाई दिएको निर्देशन परिणाम निराशाजनक रहेको बताए। उनले समस्या समाधानका उपायहरू खोज्नसपर्ने धारणा व्यक्त गरे। प्रधानमन्त्री दाहालले अब प्रशासनमात्रै नभएर समग्र शासकीय सुधारमा नै सरकारको ध्यान रहेको धारणा राखे।

त्यस्तै, प्रधानमन्त्री प्रचण्डले छिटै नीति कार्यक्रमको तर्जुमा र नयाँ बजेटको तयारी गर्नुपर्ने भन्दै अर्थतन्त्रको सुधारहरुका उपायहरु अवलम्वन गर्दै अघि बढिने जिकिर गरे। उनले सरकारले विभिन्न क्षेत्रको सुधारका लागि धेरै प्रयास गरेको तर परिणाम जनता सन्तुष्ट हुने ठाउँसम्म पुग्न नसकेको बताए।