सुनकोसी नदीमा बेपत्ताहरुको खोजीको लागि गोताखोर परिचालन

काठमाडौँ। सुनकोसी नदीमा गाडी खसेर बेपत्ता भएका प्राविधिक शिक्षा तथा व्यावसायिक तालिम परिषद् (सीटीईभीटी)का तीन कर्मचारीको खोजीका लागि गोताखोर परिचालन गरिने भएको छ। प्रहरी नायव उपरीक्षक (डीएसपी) चिरञ्जीवी दाहालका अनुसार अहिले नेपाल प्रहरी, सशस्त्र प्रहरीले स्थानीयको सहयोगमा खोजी गरिरहेका छन्।

खोजी कार्यका लागि गोताखोर पनि बोलाइएको छ। उनीहरू अहिले भकुन्डेबेँसी पुगेको डीएसपी दाहालले बताए।

शुक्रबार दिउँसो करिब साढे १२ बजे सिन्धुलीको खुर्कोटस्थित नदीमा गाडी खसेको थियो। गाडीमा चालकबाहेक सीटीईभीटीका निर्देशक कृष्णबहादुर केसी, सीटीईभीटीकै योजना महाशाखाका प्रमुख यमप्रसाद भुर्तेल र सीटीईभीटीकै विद्युत् प्रशिक्षक भानु पौडेल सवार थिए। तीनै कर्मचारीको अवस्था अज्ञात छ।