काठमाडौँ। प्रधानमन्त्री पुष्पकमल दाहाल प्रचण्डले विज्ञान प्रविधिको विकासका लागि हरतरहले सहयोग गर्न आफु उत्सुक रहेको बताएका छन्। नेपाल विज्ञान तथा प्रविधि प्रज्ञा प्रतिष्ठान (नाष्ट)को ४६ औं प्राज्ञसभाको बैठकलाई आज काठमाडौँमा सम्बोधन गर्दै प्रधानमन्त्रीले त्यस्तो बताएका हुन्।
नाष्ट स्थापनाको ४० वर्षमा जम्माजम्मी ४ अरबको बजेटबाट गरिएका विज्ञान, प्रबिधि र प्रवर्धनात्मक कार्यहरू प्रशंसनीय भएको भन्दै प्रधानमन्त्रीले जति काम भएका छन् राम्रो भएको तर त्यक्तिले मात्र अब प्रर्याप्त नहुने बताएका हुन्।
राज्यको ध्यान अझै विज्ञान र प्रविधिमा केन्द्रित हुन नसकेको भन्दै प्रधानमन्त्री प्रचण्डले भने, ‘प्राज्ञिकहरूको सुझाव र सल्लाह एवं बन्दै गरेको विज्ञान, प्रविधि र नवप्रवर्तन सम्बन्धी विधेयकअनुसार देशको रूपान्तरका लागि हातेमालो गर्दै काम गर्दै जान निर्देशित गर्दछु। देशमा विज्ञान तथा प्रविधिको विकासका लागि हरतरहले सहयोग गर्न उत्सुक रहेको पनि यहाँहरूलाई जानकारी गराउँछु।’
नवीनतम र उदीयमान प्रविधि विकासको अपरिहार्यतालाई आत्मसात गर्दै राष्ट्रको ध्यान यसतर्फ आकषिर्त गर्न नाष्टले गरेको सत्प्रयासको प्रधानमन्त्री प्रचण्डले खुलरे प्रशंसा गरे।
‘विज्ञान र प्रविधिको अनुसन्धानमा सक्रिय रहेर, अनुसन्धानकर्तालाई सहयोग र सहकार्य गरेर, विज्ञान र प्रविधिको विस्तारलाई प्रवर्धन गर्दै जे(जति गर्नुभएको छ, नास्ट र यसका सहयात्री संस्थाहरूमा हार्दिक धन्यवाद व्यक्त गर्दछु,’ उनले भने।
