काठमाडौँ। मुगुमा एकै परिवारका चारजनाको सामूहिक हत्या घटनाको अनुसन्धान गर्न प्रहरीको केन्द्रीय अनुसन्धान ब्युरो (सीआईबी)ले प्रहरी नायब उपरीक्षक (डिएसपी)को नेतृत्वमा चार सदस्यीय टोली पठाउने भएको छ।
सीआईबी स्रोतले जघन्य अपराध पिलरका प्रमुख डीएसपी धर्म भण्डारीको नेतृत्वमा चार सदस्यीय टोली शनिबार मुगु प्रस्थान गर्ने जानकारी दियो।
गत कार्तिक १० मा मुगुको छायानाथरारा नगरपालिका–६, मन्दुका २८ वर्षीया श्रीदेवी बोहोरा, ११ वर्षीय मनोज, ९ वर्षीया अप्सरा र आठ महिनाका रहरको शव फेला परेको थियो।
हत्या भएको एक साता बित्दा पनि मुगु प्रहरीले आरोपीबारे कुनै क्लू नै पत्ता लाग्न नसकेपछि कर्णाली प्रदेश प्रहरीले प्रहरी प्रधान कार्यालयलाई अनुसन्धानका लागि सिआईबीको टोली पठाइदिन पत्राचार गरेको थियो। पत्राचार भएपछि सीआईबीको टोली अनुसन्धानका लागि त्यसतर्फ पठाउन लागिएको प्रहरी प्रवक्ता प्रहरी नायब महानिरीक्षक (डीआईजी) कुवेर कडायतले जानकारी दिए।
सीआईबीका एसएसपी दिनेश आचार्यले शनिबार डीएसपीको नेतृत्वमा सामुहिक हत्याको अनुसन्धान गर्न टोली पठाउने तयारी भइरहेको जानकारी दिए।
हत्यारा पत्ता नलागेसम्म पीडित परिवारले शव नबुझ्ने बताएका छन्। चारजनाकै शव जिल्ला अस्पताल मुगुमा राखिएको छ।
उनीहरूको धारिलो हतियार प्रयोग गरेर हत्या भएको अनुसन्धानबाट खुलेको छ।
