काठमाडौँ। हलचोकस्थित सशस्त्र प्रहरीको पेट्रोल पम्पलाई एक लाख रुपैयाँ जरिवाना गरिएको छ। गुणस्तर तथा नापतौल विभागले सो पम्पलाई एक लाख रुपैयाँ जरिवाना गरेको हो।
कम परिमाणमा डिजेल बेचेको छानबिनमा पुष्टि भएपछि जरिवाना गरिएको विभागले जनाएको छ।
प्रधानमन्त्री तथा मन्त्रीपरिषद्को कार्यालय, राष्ट्रिय सतर्कता केन्द्र, नेपाल आयल निगम, गुणस्तर तथा नापतौल कार्यालय काठमाडौँ र जिल्ला प्रशासन कार्यालयको संयुक्त टोलीले गरेको अनुगमनमा उक्त पेट्रोल पम्पमा रहेको डिजेलको एउटा नोजलबाट २५ एमएल कम डिजेल आएपछि कारबाही गरिएको हो। पाँच लिटरमा जाँच गर्दा २५ एमएलसम्म कम डिजेल आएको गुणस्तर तथा नापतौल कार्यालय काठमाडौँका सूचना अधिकारी निराजन पुडासैनीले जानकारी दिए। उनका अनुसार ऐन नियमले दिएको घट बढीको हद पाँच लिटरमा १५ एमएलसम्म रहेको छ।
कार्तिक १ गते भएको अनुगमनमा सो पम्पको एउटा नोजलबाट कम परिमाणमा डिजेल आएपछि कार्यालयले प्राविधिकसहित थप अनुसन्धान गरेको थियो। अनुसन्धानमा पनि कम परिमाणमा डिजल आएपछि अधिकतम एक लाख रुपैयाँ जरिवाना गरिएको हो। सशस्त्र प्रहरी बल नेपालका प्रहरी वरिष्ठ उपरीक्षक एवम् प्रवक्ता राजेन्द्र खड्काले पाँच पटक परीक्षण गर्दा एउटा नोजलमा दुई पटक कम परिमाणमा पेट्रोल आएको बताए। उनले भने, ‘नापतौलकै कर्मचारीले सेट गर्ने भएकाले हाम्रा मान्छेले चाहेर पनि तलमाथि हुने कुरा भएन। कुनै इन्टेन्सनले गरेको पनि होइन।’
यसैगरी टोलीले दसैँ अघि गरेको अनुगमनमा काठमाडौँ उपत्यकाका अन्य चार वटा पेट्रोल पम्पमा पनि कम परिमाणमा पेट्रोलियम पर्दाथ विक्रिवितरण भएको पाइएको थियो। भ्यालीबाबा सप्लार्यस, तीनकुने (पेट्रोल २० एमएल कम), श्यामा आयल, कलङ्की (डिजेल २० एमएल कम), हरिसिद्धी आयल स्टोर, नयाँ बानेश्वर (दुई वटा नोजलमा पेट्रोल ३० एमएल कम) र महालक्ष्मी विश्वकर्मा टेडर्स, सातदोवाटो (डिजेल २५ एमएल कम)मा कम परिमाणमा डिजेल र पेट्रोल वितरण भएको पाइएको थियो।
