काठमाडौँ। भारतले चिनी निर्यातमा कडाइ गरेको कारण नेपालमा चिनीको हाहाकार छ। नेपाली बजारमा चिनीको अभाव भइरहेको बेला सरकारले कुटनीतिक पहल गरिरहेको जिकिर गरेको छ।
तर, बजारमा महँगोमा चिनी बिक्री गर्नका लागि सरकारले निर्यातमा ध्यान नदिदा चिनीको हाहाकार भएको उपभोक्ताहरुले बताईरहेका बेला सरकारले भने भारतसँग कुटनीतिक पहल जारी राखेको बताएको छ।
संसद्को कृषि समितिमा उद्योग मन्त्रालयका सचिव मुकुन्दप्रसाद निरौलाले भारतसँग कूटनीतिक लबिइङसँगै स्वदेशका किसानलाई प्रोत्साहन गर्ने विकल्पमा कुरा भइरहेको जनाए।
नेपालमा वार्षिक तीन लाख टन चिनीको माग रहे पनि उत्पादन साढे एक लाख टन हाराहारीमा छ। भारतले चिनी निर्यातमा प्रतिबन्ध लगाएपछि समस्या देखिएको मन्त्रालयको भनाइ छ।
स्वदेशी उत्पादनको चिनी सकिएको र भारतलगायतबाट आयात हुने चिनी नआएका कारण बजारमा चिनीको अभाव भएको व्यापारीहरुले बताएका छन्।
गत वर्ष नेपालमा ११ वटा चिनी मिलले मात्रै उखु क्रसिङ गरेर चिनी उत्पादन गरेको नेपाल चिनी उत्पादक संघले जनाएको छ। ति उद्योगमार्फत एक लाख २० हजार मेट्रिकटन चिनी उत्पादन भएकोमा धेरै मिलले चिनी बिक्री गरिसकेको र भारतबाट चिनी अयात हुन नसक्दा समस्या परेको संघका महासचिव राजकुमार अग्रवालले बताएका छन्।
