काठमाडौँ । चार दिने नेपाल भ्रमणमा रहेका संयुक्त राष्ट्र संघका महासचिव एन्टोनियो गुटेरेस सोमबार दिउँसो पोखरा जाँदैछन् ।
उनलाई गण्डकीका मुख्यमन्त्री सुरेन्द्रराज पाण्डे, पोखरा महानगर प्रमुख धनराज आचार्य, कास्कीका प्रमुख जिल्ला अधिकारी वासुदेव घिमिरे लगायतले विमानस्थलमा स्वागत गर्ने कार्यक्रम रहेको छ ।
फेवाताल पारी रहेको फिस्टेल लजमा उनी सोमबार राति बस्नेछन् ।
महासचिव गुटेरेस मङ्गलबार बिहान अन्नपूर्ण आधार शिविर(एबिसी) जाने कार्यक्रम छ । बिहान साढे छ बजे आधार शिविरका लागि प्रस्थान गरी उनी ६ः ५० मा त्यहाँ पुग्नेछन् । त्यहाँ महासचिव गुटेरेसले जलवायु परिवर्तनका कारण सर्वसाधारणको जनजीवनमा परेका असरबारे सर्वसाधारणसँग समेत कुरा गने{छन् ।
पोखरा महानगरका प्रमुख धनराज आचार्यले विमानस्थलमा गुटेरेसको भव्य स्वागत गरिने बताएका छन् । उनले भने, “यो भ्रमणले पोखरा र समग्र गण्डकी प्रदेशमै उत्साह छाएको छ । पोखराको पर्यटन प्रवर्द्धनसहित यसको अन्तर्राष्ट्रिय बजारीकरणमा पनि भ्रमणले ठुलो योगदान पुग्छ ।”
महासचिव एन्टोनियो गुटेरेसको स्वागत र सुरक्षाका लागि पोखरामा विशेष तयारी गरिएको छ । कास्कीका प्रमुख जिल्ला अधिकारी घिमिरेले महासचिवको आगमनलाई लक्षित गरी सुरक्षा व्यवस्था मजबुत पारिएको जानकारी दिए ।
विमानस्थलदेखि फिस्टेल गेटसम्मको सडक सिँगारिएको छ । आइतबार सुरक्षा निकायले पोखरा विमानस्थलदेखि फिस्टेल लजसम्म सुरक्षाको पूर्वाभ्यास गरेका छन् । अन्नपूर्ण आधार शिविरमा शुक्रवार नेपाली सेनाको टोली पुगिसकेको छ ।
