सोमबार त्रिभुवन विमानस्थलबाट अन्तर्राष्ट्रिय उडान–अवतरणमा कीर्तिमान

काठमाडौँ। त्रिभुवन अन्तर्राष्ट्रिय विमानस्थल (टीआईए)मा सोमबार एकै दिन अहिलेसम्मकै धेरै उडान र धेरै यात्रुले हवाई यात्रा गरेका छन्।

विमानस्थल कार्यालयले दिएको जानकारी अनुसार सोमबार एकैदिन ११४ उडान भएको हो। जुन एक दिनको उडान तथ्यांकअनुसार अहिलेसम्मकै सर्वाधिक हो।

११४ उडानमार्फत १६ हजार ५०९ जनाले हवाई यात्रा गरेका छन्। एकै दिन यति धेरै संख्यामा हवाई यात्रा गरेको रेकर्ड पनि अहिलेसम्मकै उच्च रहेको विमानस्थल कार्यालयले जनाएको छ।

नेपालीहरुको महान पर्व दशैंको चहलपहल बढेपछि अहिले विमानस्थल व्यस्त छ। अहिले नेपालमा चाडबाडको सिजन चलेको छ। साथमा पर्यटकीय मौसम समेत सुरु भएको छ।

सोही कारण वायुसेवा कम्पनीहरुले उच्च चापमा उडान गरिरहेका छन्। आन्तरिकतर्फ समेत वायुसेवा कम्पनीहरुले अहिले एकतर्फी झण्डै शतप्रतिशत अक्कुपेन्सीमा उडान गरिरहेका छन्।