‘फागुन १’ को बिदाको निर्णय परिवर्तन हुँदैनः सञ्चारमन्त्री

काठमाडौँ। फागुन १ गते सार्वजनिक बिदा दिने निर्णय नेकपा एमाले सरकारमा सहभागी भएको बेला गरिएको सरकारले प्रष्टीकरण दिएको छ। सञ्चार तथा सूचना प्रविधिमन्त्री एवं सरकारकी प्रवक्ता रेखा शर्माले जनयुद्ध दिवसमा सार्वजनिक बिदा दिने निर्णय मन्त्रिपरिषद् बैठकको निर्णय भएकाले कुनै एक नेताले भन्दैमा परिवर्तन नहुने बताएकी हुन्।

मन्त्रालयमा मन्त्रिपरिषद् बैठकका निर्णय सार्वजनिक गर्न आयोजित पत्रकार सम्मेलनमा पत्रकारहरूले सोधेको प्रश्नको जवाफमा मन्त्री शर्माले भनिन्, ‘यो क्याबिनेट डिसिजन हो। हिजो हामी नेकपा एमालेसँगै गठबन्धनमा थियौं। त्यतिबेलाको गठबन्धनको सरकारले फागुन १ गते जनयुद्ध दिवस मनाउने भनेर क्याबिनेटबाट पारित गरेको विषय हो। क्याबिनेटले पास गरेको विषय संसद्मा एकजना नेताले बोल्दैमा केही हुँदैन। क्याबिनेटले पारित गरिसकेपछि जनयुद्ध दिवस मनाएर जान्छ। जनयुद्ध दिवसको विषयमा उहाँले व्यक्त गरेको अभिव्यक्तिमा सरकारको सहमति छैन।’

मंगलबारको संसद्मा प्रमुख प्रतिपक्षी दलका नेता एमाले अध्यक्ष केपी शर्मा ओलीले मंगलबार प्रतिनिधिसभाको बैठकमा हिंसा थालेको दिन दिवस हुन नसक्ने भन्दै त्यस दिन दिइएको बिदा खारेज नगरे कदम चाल्ने चेतावनी दिएका थिए। त्यसको जवाफमा सरकारी प्रवक्ता शर्माको यस्तो भनाइ आएको हो।