टर्की पठाइदिन्छु भन्दै करोडौं रकम ठगी गर्ने महिला पक्राउ

काठमाडौँ। वैदेशिक रोजगारीका लागि टर्की पठाइदिन्छु भन्दै करोडौँको ठगी गरेको आरोपमा एक महिला पक्राउ परेकी छिन्। पक्राउ पर्नेमा पोखराको लेखनाथ टोल बस्ने ३२ वर्षीया सुरुची भुजेल रहेकी छिन्।

भुजेलले पोखराका ४२ वर्षीय विनोद श्रेष्ठको संलग्नतामा सिर्जन कुमार राईसहित ३० जनालाई टर्की पठाइदिन्छु भन्दै ठगी गरेका थिए। भूकम्पपछि पुनर्निर्माणका लागि यूएनले सहयोग गर्ने उद्देश्यले मासिक १४ सय अमेरिकी डलर तलब दिने प्रलोभनमा पारी पीडितबाट १ करोड १५ लाख ९९ हजार ८ सय रुपैयाँ ठगी गरेका नेपाल प्रहरीको केन्द्रीय अनुसन्धान ब्यूरोले जनाएको छ।

वैदेशिक रोजगार विभागले पठाएको पत्रका आधारमा आवश्यक कारबाहीका लागि सीआईबीको टोलीले भुजेललाई आसोज ६ गते पोखराबाट पक्राउ गरेको हो।

काठमाडौँ जिल्ला अदालतबाट ७ दिनको म्याद लिई ठगीसम्बन्धी कसुरमा अनुसन्धान भइरहेको प्रहरीले जानकारी दिए।